दुर्घटनामा रेडियो नेपालका बुटवल सम्वाददाताको मृत्यु

सप्तरी ।सप्तरीको कञ्चनरुप नगरपालिका वडा नम्बर ११ बरमझियास्थित पूर्वपश्चिम राजमार्गमा आज बिहान जीप दुर्घटना हुँदा रेडियो नेपालका सम्वाददाता डायल्सन अधिकारीको निधन भएको छ ।
बुटवलबाट आज बिहान विराटनगर जाँदै गरेको बा.१६.च २२३५ नम्बरको जीप राजमार्गमा अनियन्त्रित भई पल्टिएर दुर्घटना भएको र उपचारका लागि लैजाने क्रममा संवाददाता अधिकारीको निधन भएको प्रहरी नायब उपरिक्षक मकेन्द्र मिश्रले जानकारी दिनुभयो ।
दुर्घटनामा तिलोत्तममा नगरपाकिला वार्ड नं. १ का वडाअध्यक्ष तामनाथ पाण्डे, वार्ड नम्वर ५ का अध्यक्ष सोहन चौधरी, वाणिज्य संघका अध्यक्ष जेपी कँडेल र चालक अशोक भण्डारी घाईते भएका छन् । चालकको अवस्था गम्भिर छ ।
चारै जनालाई ठेलीया स्थित धर्मेस्वर हस्पिटलमा प्राथमिक उपचारपछि थप उपचारका लागि विराटनगर स्थित नोवेल अस्पताल पठाईएको छ ।
स्वर्गीय अधिकारीको शव पोष्टमार्टमका लागि राजविराज स्थित गजेन्द्रनारायण सिंह सगरमाथा अञ्चल अस्पताल पठाईएको प्रहरी नायब उपरिक्षक मकेन्द्र मिश्रले बताउनुभयो ।
पुर्व जाँदै गरेको स्कारपियो पिकअप आफै अनियन्त्रीत भई दुर्घटना भएको इलाका प्रहरी कार्यालय कञ्चनपुरले जनाएको छ ।
स्वर्गीय डायलसन अधिकारी लामो समयदेखि रेडियो नेपालको रुपन्देही जिल्ला संवाददाताका रुपमा कार्यरत रहदै आउनुभएको थियो ।
उहाको निधनमा रेडियो नेपालले गहिरो शोक प्रकट गर्दै परिवारजनमा समवेदना व्यक्त गरेको छ ।