२०७६ साल मंसिर ४ गते बुधबार

तपाईँ सुन्दै हुनुहुन्छः

सांसद बस्नेतद्वारा स्ववासी ९८ परिवारलाई लालपुर्जा वितरण   

रेडियो नेपाल २०७६ असोज १८ गते १२:२५

भक्तपुर, १८ असोज  –  सांसद महेश बस्नेतले सूर्यविनायक नगरपालिका–४ दधिकोट चित्रपुरका ९८ घर परिवारलाई लालपूर्जा वितरण गर्नुभएको छ ।

वडा कार्यालयले आज दधिकोटको चित्रपुरमा आयोजना गरेको लालपुर्जा वितरण कार्यक्रममा नेपाल कम्युनिष्ट पार्टी (नेकपा)का केन्द्रीय सदस्यसमेत रहनुभएका उहाँले लालपुर्जाविहीन परिवारलाई लालपुर्जा वितरण गर्नुभएको हो ।

सयौँवर्षदेखि चित्रपुर बस्तीका रुपमा रहेको परम्परागत उक्त बस्तीका बासिन्दाले अहिलेसम्म लालपुर्जाविहीन हुँदा आफ्नै जग्गा र घरको भोग चलन गरे पनि अन्य प्रयोजनका लागि उपयोग गर्न पाएका थिएनन् । भूकम्पमा सिङ्गो बस्ती भत्किँदासमेत राहत लिन निकै समस्या परेको यहाँका बासिन्दाले अहिले भूकम्पबाट भत्किएका घर बनाएपछि भने लालपुर्जा पाएका छन् ।

लालपुर्जा वितरण गर्दै पूर्वमन्त्रीसमेत रहनुभएका बस्नेतले गत निर्वाचनमा यहाँका लालपुर्जाविहीन बासिन्दालाई लालपुर्जा दिलाइदिने प्रतिबद्धता व्यक्त गरेअनुसार आफ्नै पहलमा लालपुर्जाको व्यवस्था गरी आज वितरण गरेर आफ्नो घोषणा साकार पार्न सफल भएको बताउनुभयो । उहाँले लालपुर्जा वितरणदेखि विपद्मा राहत वितरणमा कुनै दल हेरेर विभेद नगरेको उल्लेख गर्नुभयो ।

उहाँले लालपुर्जा पाएपछि अब आफ्नै घर धितो राखेर छोराछोरी पढाउनदेखि व्यवसाय गर्नसमेत बाटो खुलेको चर्चा गर्नुभयो । चित्रपुरमा क्रसरोड बनाउन लागेको चर्चा गर्दै सांसद बस्नेतले ललितपुरको बालकुमारीदेखि बालकोट, चित्रपुर हुँदै शिकारीटार, अनन्तलिङ्गेश्वर मन्दिर, कालिकाडाँडा हुँदै रानीकाटेसम्म जाने सूर्यविनायक नगरपालिकाको मुख्य सडक बन्न लागेको बताउनुभयो ।

कार्यक्रममा ३ नं प्रदेशका सांसद शशीजङ्ग थापाले भक्तपुरमा विकासको मूल फुटेको बताउँदै सङ्घ, प्रदेश र स्थानीय तहको बजेटले दुईवर्षको अन्तरालमा गाउँ गाउँमा विकासका लहर आएको उल्लेख गर्नुभयो ।

त्यसअवसरमा नगरपालिकाका प्रमुख वासुदेव थापाले नगरपालिकाले दुईवर्षमा विकासमा निकै लामो फड्को मारेको र अबका तीन वर्षमा विकासले पूर्णता पाउने बताउनुभयो । वडा नं ४ दधिकोटका अध्यक्ष उत्तम थापालगायत विभिन्न व्यक्तिले विकासका गतिलाई रोक्न र अवरोध पु¥याउन नहुनेबारे चर्चा गर्नुभएको थियो ।
रासस