ग्रिजम्यानको दुई गोलमा बार्सिलोनाको जित

काठमाडौं । एन्टोनी ग्रिजम्यानको दुई गोलको सहयोगमा बार्सिलोनाले कोपा डेल रे फुटबलमा इबिजालाई हराएको छ ।

बुधबार राति अन्तिम ३२ को खेलमा बार्साले तेस्रो डिभिजनको क्लब ईबिजालाई २–१ गोल अन्तरले हराएको हो ।

बार्सिलोनाले ३२ पटक प्रतियोगिताको उपाधि जितेको छ । पछिल्ला पाँच सिजनमा उसले चार पटक उपाधिमा कब्जा जमाएको छ ।

लियोनल मेस्सी र जेरार्ड पिकेलाई बिश्राम दिदै ग्रिजम्यानलाई मैदान उतारिएको थियो ।

खेलको नवौ मिनेटमा जाभी पेरेजले गोल गर्दै इबिजालाई सुरुवाती अग्रता दिलाएका थिए ।

बार्सा स्टार ग्रिजम्यानले ७२ औ मिनेटमा बराबरी गोल फर्काएका थिए । ईन्जुरी समयमा व्यक्तिगत दोस्रो गोल गर्दै ग्रिजम्यानले बार्सिलोनालाई जिताएका थिए ।