२०७७ साल जेठ २१ गते बुधबार

तपाईँ सुन्दै हुनुहुन्छः

प्रिमियर लिगमा आजबाट सामूहिक अभ्यास थालिँदै

रेडियो नेपाल २०७७ जेठ ६ गते ११:००

काठमाडौं- विश्वव्यापी महामारीका रुपमा फैलिएको कोरोना भाइरसको संक्रमणका कारण रोकिएको प्रिमियर लिग पुनरागमनको तयारी थालिएको छ ।

इंग्लिस प्रिमियर लिग क्लबले मंगलबारबाट सानो समूह बनाएर प्रशिक्षण थाल्ने भएका छन् । सोमबार बसेको प्रिमियर लिग क्लबको बैठकले सानो समूहमा अभ्यास गर्न अनुमति दिने भएको हो ।

प्रिमियर लिगका २० वटै क्लबले अभ्यासको प्रस्तावमा समर्थन गरेका थिए । तर अभ्यासका क्रममा खेलाडीहरूले सामाजिक दूरीको नियम भने पालना गर्नुपर्नेछ । क्लबका खेलाडी, प्रशिक्षक र स्वास्थ्यकर्मीको रायका आधारमा निर्णय लिइएको प्रिमियर लिगले जनाएको छ ।

‘सबै खेलाडी अभ्यासमा सहभागी हुन पाउँछन् तर त्यसका लागि सरकारले बनाएको स्वास्थ्य तथा सामाजिक दूरीको निर्देशिका भने गम्भीर रूपमा पालना गर्नुपर्नेछ,’ प्रिमियर लिगले बैठकपछि जारी गरेको विज्ञप्तिमा भनिएको छ, ‘सबै खेलाडी, प्रशिक्षक र मैदानका कर्मचारीको स्वास्थ्य पहिलो प्राथमिकता हो । त्यसैले स्वस्थ वातावरणमा बसेर अभ्यास गर्नुपर्नेछ । अहिले सुरुआती चरणमा सानो समूह बनाएर अभ्यास गर्नुपर्नेछ । अर्काे चरण के कस्तो हुनेबारे आगामी दिनमा निर्णय लिइनेछ ।’

त्यसका लागि खेलाडीहरूले घरबाटै मैदानमा अभ्यास पोसाक र आफ्नै गाडीमा जानुपर्नेछ । प्रिमियर लिगका २० मध्ये १४ क्लबको सहमतिपछि मात्र स्वास्थ्य र अभ्याससम्बन्धी निर्देशिका पारित हुने बताइएकोमा सबै क्लबले समर्थन गरेका हुन् ।

कोरोनाको कारण गत मार्चबाट प्रिमियर लिग स्थगित गरिएको छ । तर, प्रिमियर लिग जुनबाट सुचारु गर्ने तयारी गरिएको छ ।

प्रिमियर लिगका २० क्लबले अब यस सिजन ९२ खेल खेल्न बाँकी रहेको छ । यस सिजन लिभरपुल उपाधि नजिक रहेको छ । लिभरपुल दोस्रो स्थानको म्यानचेस्टर सिटी भन्दा २५ अंकले अघि रहेको छ ।

लिभरपुलको ८२ अंक रहदा सिटीको ५७ अंक रहेको छ । यस सिजन लिभरपुललाई ऐतिहासिक उपाधि जित्ने अवसर रहेको छ ।

गत शनिबारबाट जर्मनीमा बुन्डेसलिगा सुचारु भइसकेको छ ।