सोलुखुम्बुका दुई स्थानमा माछापुच्छ्रे बैङ्कको शाखारहित बैङ्किङ सेवा थप
सोलुखुम्बु । दुई वर्षअघि सोलुखुम्बुको सल्लेरीमा सेवा विस्तार गरेको माछापुच्छ्रे बैङ्कले एकै पटक दुई स्थानमा नयाँ शाखारहित बैङ्किङ सेवा सञ्चालनमा ल्याएको माछापुच्छ्रे बैङ्क सल्लेरी शाखाका प्रबन्धक टेकबहादुर बस्नेतले जानकारी दिनुभयो ।
सोलुखुम्बुको सबैभन्दा ठुलो गाउँपालिका थुलुङ दूधकोशी गाउँपालिका–८ देउसमा शाखारहित बैङ्किङ सेवा सुचारु गरेको हो । सेवा सुचारु गर्दै गाउँपालिका अध्यक्ष असिम राईले माछापुच्छ्रे बैङ्कको शाखा रहित बैङ्किङ सेवाले गाउँपालिको आर्थिक गतिविधिमा ठुलो टेवा पुग्ने बताउनुभयो ।
स्थानीय व्यवसायी गोविन्द नाछिरिङलाई बजार प्रतिनिधि बनाई प्राविधिक उपकरण समेत हस्तान्तरण गरेर सेवा सञ्चालनमा ल्याइएको हो ।
त्यस्तै, माप्य दूधकोशी गाउँपालिका–२ राप्छामा पनि बैङ्कले शाखारहित बैङ्किङ सेवा विस्तार गरेको छ ।
यसबाट माप्य दूधकोशी गाउँपालिकाको मुख्य गरी वडा नम्बर १, २ र ३ का स्थानीयलाई वित्तीय सेवा मिल्नेछ । उक्त स्थानमा स्थानीय प्रदीप राईलाई बजार प्रतिनिधि व्यवस्था गरी सेवा थालेको हो ।
सजिलो र भरपर्दो माध्यमबाट वित्तीय कारोबारका लागि शाखारहित बैङ्किङ सेवाले सहज बनाउने प्रबन्धक बस्नेतले बताउनुभयो ।
स्थानीयमा बचत गर्ने बानीको विकास गराउँदै ऋण परिचालनको माध्यमबाट लघु उद्यमका लागि सहयोग पुर्याउँदै ग्रामीण क्षेत्रका नागरिकसम्म वित्तीय पहुँच पुर्याउनका लागि शाखारहित बैङ्किङ सेवा विस्तार गरिएको उहाँको भनाइ छ ।
यसअघि सोलुखुम्बुको नेचासल्यान गाउँपालिकाको सल्यानमा सेवा सञ्चालनमा आइसकेको छ । सेवा सुरु भएपछि सर्वसाधारणलाई बैङ्किङ कारोबारका लागि टाढा जानुपर्ने बाध्यता कम हुने स्थानीय बताएका छन् ।
प्रतिक्रिया राख्नुहोस्