रुपन्देहीका १८ पत्रकार कोरोना संक्रमित 

भैरहवा । नेपाल पत्रकार महासङ्घ रुपन्देहीले कोरोनाको दोस्रो लहरले रुपन्देहीका १८ जना पत्रकार संक्रमित भएको जनाएको छ ।

पत्रकार महासङ्घ रुपन्देहीका पूर्व अध्यक्ष, कार्यसमिति सदस्य तथा अग्रज एवं विभिन्न सञ्चार माध्यममा आबद्ध १८ जना पत्रकारहरूमा कोरोना संक्रमण पुष्टि भएको महासङ्घले जनाएको छ ।

महासङ्घ रुपन्देहीका अध्यक्ष रामराज पोख्रेल र सचिव विनोद परियारले सोमबार प्रेस विज्ञप्ति जारी गर्दै संक्रमित पत्रकारहरूको शीघ्र स्वास्थ्य लाभको कामना गर्नुभएको छ । सङ्क्रमितमध्ये ३ जना भने अस्पतालमा भर्ना भई उपचाररत छन् । सङ्क्रमितमध्ये केही निको भएको र अधिकांश कोरोनासँग जुधिरहेको विज्ञप्तिमा उल्लेख छ ।

पत्रकारको जीवन नै असुरक्षामा रहने गरी रिपोर्टिङ गर्नुपर्ने बाध्यात्मक अवस्था सिर्जना नगर्न र सकेसम्म इन्टरनेट, फोन तथा अन्य वैकल्पिक प्रविधिको प्रयोग गरी घरबाटै काम गर्ने वातावरण मिलाउन दिन समेत सम्पूर्ण सञ्चार गृहलाई आग्रह गरेको छ ।

महासङ्घ रुपन्देहीले कोरोनाको बहानामा खाइपाई आएको सेवा सुविधा कटौती नगर्न समेत सञ्चार गृहलाई अनुरोध गरेको छ ।

त्यसै गरी महासङ्घ रुपन्देहीको सोमबार बसेको कार्यसमितिको भर्चुअल (अनलाइन) बैठकले कोरोना महामारीले बिस्तारै स्वास्थ्य समस्यासँगै पेसागत असुरक्षा समेत बढाउन सक्ने भएकाले ‘पत्रकारको कोरोना तथा आपतकालिन कोष’ स्थापना गर्ने निर्णय गरेको छ ।

यो कोषमा तीन तहका सरकार, विभिन्न सामाजिक सङ्घ–संस्था, व्यक्ति तथा पत्रकारिता क्षेत्रलाई माया गर्ने शुभेच्छुकहरूलाई आर्थिक तथा स्वास्थ्य सुरक्षा एवं पत्रकारका लागि आवश्यक सामग्री समेत स्वतःस्फूर्त रुपमा सहयोग गर्न अपिल गरेको छ ।

नेपाल पत्रकार महासङ्घ रुपन्देहीको शाइन रेसुङ्गा डेभलपमेन्ट बैङ्कमा रहेको खाता नम्बर ००१००१००००५०३३०००००१ मा जम्मा गर्न सकिने विज्ञप्तिमा भनिएको छ । साथै बैठकले कोरोना महामारीले पत्रकारहरूलाई पारेको प्रभावलाई मध्यनजर गर्दै स्वास्थ्य सुरक्षा सामाग्रीको व्यवस्थापन गर्ने, संक्रमित पत्रकारहरूको उपचारमा सक्दो संस्थागत पहल गर्ने निर्णय गरेको छ ।